«Атырау жылу электр орталығы» акционерлік қоғамы. Бұрын жіберілген ақпаратты толықтыру. «Атырау жылу электр орталығы» АҚ электр энергиясын өндіруге және өткізуге шекті тарифті көтеру қажеттілігінің себептері туралы.

Алдыңғы материалдарда көрсетілгендей, станцияның негізгі жабдықтарының (қазандықтар мен турбиналар) тозу деңгейі 2023 жылғы 01.01. жағдай бойынша – 56,07% құрайды. 2022 жылғы желтоқсанда өткізілген тексеріс қорытындысы бойынша, энергетика саласындағы мемлекеттік және бақылаушы органдар өкілдері кірген комиссияның шешімімен, «Атырау ЖЭО» АҚ авариялық қауіптілік бойынша «сары аймаққа» енгізілді.

Станцияның негізгі жабдықтарының тозуын төмендету, қайта жаңғырту, модернизациялау, жаңарту және негізгі технологиялық жабдықтың парктік ресурсын ұзарту бойынша іс-шараларды жүргізу, сондай-ақ жөндеу науқанын жүзеге асыру және 2023–2024 жылдардағы күзгі-қысқы кезеңде өңір тұтынушыларын электр және жылу энергиясымен үздіксіз қамтамасыз ету үшін қосымша қаржыландыру тарту қажет.

Қалыптасқан жағдайдан шығудың және жоғары техникалық-экономикалық көрсеткіштерге қол жеткізудің жалғыз жолы – электр энергиясын өндіру тарифін арттыру.

Негізгі себептер ретінде келесі факторлар қарастырылады: табиғи газды жеткізу бағасының өсуі, «Интергаз Орталық Азия» АҚ-ның газ тасымалдау тарифінің қымбаттауы, сондай-ақ жөндеу және эксплуатацияға қажетті материалдардың қымбаттауы (олардың басым бөлігі ТМД және жақын шетелдерден жеткізіледі):

1. «Теңізшевройл» ЖШС жеткізетін табиғи газ бағасы 2023 жылғы 1 шілдеден бастап электр және жылу энергиясын өндіруге арналған технологиялық мақсаттар үшін 8,6%-ға өседі.

2. «Интергаз Орталық Азия» АҚ газ тасымалдау қызметтерінің тарифі 2023 жылғы 01.01. жағдай бойынша 1000 м³ үшін 5 285,66 теңге (ҚҚС-сыз) болады. Бұл 2022 жылғы орташа деңгеймен (4 885,62 теңге) салыстырғанда 8,2% өсімді құрайды.

3. Станцияны жөндеу және пайдалану үшін қолданылатын қосалқы материалдардың бағасы 40–50%-ға дейін өсті, ал кейбір химиялық реагенттер (мысалы, натрий гидроксиді, тринатрийфосфат және шайырлар) бойынша баға шамамен 2,0–2,2 есе қымбаттады.

4. Өндірістік персоналдың еңбекақысын арттыру қажеттілігі бар, себебі энергетика саласында кадрлар өндірістік процестің барлық кезеңінде маңызды рөл атқарады. 2022 жылғы деректер бойынша «Атырау ЖЭО» АҚ өндірістік персоналының орташа айлық жалақысы 267 279 теңгені құрады, ал өңір бойынша орташа жалақы 420 415 теңге деңгейінде. Төмен жалақы салдарынан кадрлардың тұрақсыздығы байқалады, қызметкерлер ТШО, KUS, АНПЗ сияқты жоғары жалақы төлейтін кәсіпорындарға ауысуда. Негізгі мақсат – энергетика саласында кадрларды ұстап қалу, оны тек жалақыны арттыру арқылы жүзеге асыруға болады.